कामना सेवा विकास बैंकले प्रस्तावित १९ दशमलव ४७ प्रतिशत लाभांश मंगलवार वार्षिक साधारण सभा सम्पन्न गरी पारित गरेको छ । कम्पनीले पार्क भिलेज रिसोर्ट, बूढानीलकण्ठमा कोभिडको जोखिमलाई ध्यानमा राखी भर्चुअल माध्यमबाट सभा सम्पन्न गरेको हो ।

सभाले गत आर्थिक वर्ष २०७७/७८ को वार्षिक प्रतिवेदन सहितका वित्तीय विवरणहरु पारित गर्नुका साथै प्रस्तावित लाभांशलाई समेत वितरणयोग्य बनाएको हो । कम्पनीले हाल कायम चुक्तापूँजी रू. २ अर्ब ६५ करोड १९ लाख ६३ हजारको आधारमा १८ दशमलव ५० प्रतिशत बोनस शेयर र कर प्रयोजनका लागि शून्य दशमलव ९७ प्रतिशत नगद लाभांश वितरणको प्रस्ताव पारित गरेको हो ।

सभाले संस्थापक समूहबाट ३ जना र सर्वसाधारण समूहबाट ३ जना गरी ६ जना सञ्चालकको निर्वाचन गर्ने कार्यक्रम तय गरेकोमा पुरानै संचालकहरुलाई निर्विरोध निर्वाचित गरेको छ । यस कम्पनीले अन्य उपयुक्त बैंक तथा वित्तीय संस्थासँग मर्जर तथा प्राप्तीमा जाने विषयमा पनि सभामा छलफल गरेको छ ।

उपयुक्त अन्य बैंक तथा वित्तीय संस्थाहरुसँगै मर्जर तथा प्राप्त प्रयोजनमा जान सदस्यहरुले स्वीकृति प्रदान गर्दै त्यसको सम्पूर्ण जिम्मेवारी संचालक समितिलाई दिने निर्णय गरेका छन् । कम्पनीले साधारण सभा र लाभांश प्रयोजनका लागि कात्तिक १० गते एक दिन बुक क्लोज गरेको छ । बुक क्लोजको आधारमा कात्तिक ९ गतेसम्म कायम शेयरधनीहरु मात्र कम्पनीले पारित गरेको लाभांश प्राप्त गर्नेछन् ।