एनआइसी एशिया बैंकको म्युचुअल फण्ड अन्तर्गत संचालित एनआइसी एशिया ब्यालेन्स्ड फण्ड र एनआइसी एशिया ग्रोथ फण्ड दुवै नाफामा छन्। अपरिष्कृत मासिक वित्तीय विवरणअनुसार असोज मसान्तमा दुवै योजनाको नाफा भदौको तुलनामा बढेको हो।

ब्यालेन्स्ड फण्डको नाफा भदौको तुलनामा २० प्रतिशत बढेको छ भने ग्रोथ फण्डको नाफा १७.८७ प्रतिशत बढेको छ। ब्यालेन्स्ड फण्डले असोजमा आफूसँग भएको साञ्जेन र रसुवागढी जलविद्युतको सेयरबाट केही सेयर बेचेर ६ कम्पनीको सेयर थप खरीद गरेको छ। योजनाले साञ्जेन जलविद्युतको ३ हजार कित्ता र रसुवागढीको १ हजार २६ कित्ता सेयर बिक्री गरेको छ। योजनासँग साञ्जेनको ३ हजार कित्ता र रसुवागढीको २९ हजार ९९७ कित्ता बाँकी छ।

असोजमा ग्लोबल आइएमई जनरल इन्स्योरेन्स, नेपाल बैंक, हिमालयन बैंक ,स्वावलम्बन लघुवित्त र समाज लघुवित्तको सेयर खरिद गरेको छ। योजनाको पोर्टफोलियोमा सबैभन्दा बढी हिस्सा नबिल बैंकको करिब ९ प्रतिशत रहेको छ। योजनासँग नबिल बैंकको ४५ हजार ३५७ कित्ता सेयर असोज मसान्तसम्म कायम रहेको छ। त्यसैगरी, नेपाल बैंकको ९० हजार ४९९ कित्ता सेयर छ।

योजनाले सेयर बजारमा सूचीकृत रहेका १२ उपसमूहमध्ये ९ वटा सेक्टरका ५८ वटा कम्पनी लगानी गरेको छ। योजनासँग यी कम्पनीका १३ लाख ७१ हजार १९६ कित्ता सेयर छ। असोज मसान्तसम्म सूचीकृत सेयरमा योजनाको ४८ करोड ८२ लाख लगानी रहेको विवरणमा देखिएको छ। योजनाको बैंक मौज्दातको रकम भदौको तुलनामा घटेको छ।

योजनाले भदौमा १७ करोड ६ लाख बैंकमा मौज्दात राखेको थियो भने असोजमा १५ करोड ५४ लाख १२ हजार राखेको छ। योजनाले बैंकमा भएको रकम निकालेर सेयरमा लगानी बढाएको देखिन्छ। योजनाको असोज मसान्तमा प्रति इकाई खुद सम्पत्ति मूल्य(एनएभि) ११.२ रुपैयाँ पुगेको छ। योजनाले असोज मसान्तमा ८ करोड ७५ लाख ५८ हजार नाफा गरेको छ। भदौमा यस्तो नाफा ७ करोड २५ लाख थियो।

एनआइसी एशिया ग्रोथ फण्डले असोज मसान्तसम्ममा १४ करोड ३८ लाख ६० हजार नाफा गरेको छ। योजनाले भदौ मसान्तसम्मा १२ करोड २० लाख नाफा गरेको थियो। नाफा बढेसँगै प्रतिइकाई खुद सम्पत्ति मूल्य(एनएभि) बढेर ११.७४ रुपैयाँ पुगेको छ। योजनाले धितोपत्रमा सूचीकृत भएका कम्पनीहरुमा ७० करोड ५८ लाख रुपैयाँ लगानी गरेको छ।

योजनाले असोजमा आफूसँग भएको ६ जलविद्युत कम्पनीका केही कित्ता सेयर बिक्री गरी सात कम्पनीमा थप लगानी बढाएको छ।आँखुखोला, युनिभर्सल पावर, रसुवागढी, साञ्जेन, जोशी, कालिका पावर जलविद्युत कम्पनीको लगानी गरेको मध्ये केही कित्ता सेयर बिक्री गरेको छ।

उक्त सेयर बिक्री गरी योजनाले ग्लोबल आइएमई, जनरल इन्स्योरेन्स, नेपाल बैंक, एनएलजी इन्स्योरेन्स, स्वावलम्बन लघुवित्त, हिमालयन बैंक र समाज लघुवित्तमा लगानी बढाएको छ। योजनाको पोर्टफोलियोमा सबैभन्दा बढी हिस्सा नबिल बैंकको ५.५८ प्रतिशत छ। योजनासँग नबिल बैंकको ४५ हजार ७९५ कित्ता सेयर छ भने एनएमबि बैंकको ७७ हजार ७६३ कित्ता छ ।