घरलाई आकर्षक बनाउन धेरै पक्षको समिश्रण मिलेको हुनुपर्छ । घरको इन्टेरियर डिजाइन, रङरोगन, बैठक कक्ष इत्यादिका साथै भान्छाकोठा तथा डाइनिङको पनि यसमा महत्त्वपूर्ण भूमिका रहन्छ ।

खासगरी भान्छामा धेरैको रुची हुन्छ। यसका लागि पछिल्लो समय बजारमा कस्ताकस्ता सामग्रीहरू आएका छन् र त्यसका लागि के कति बजेट छुट्याउनुपर्ला त?

पछिल्लो समय घरको भान्छा भन्नासाथ ‘मोडुलर किचेन’ अर्थात् आधुनिक भान्छा भन्ने बुझाइ स्थापित हुँदै गएको छ । यस्तो आधुनिक भान्छाले आकर्षक र छरितो डिजाइन, सेटिङ, त्यहाँ प्रयोग भएको चिम्नी, चुल्होका साथै अन्य आधुनिक उपकरणहरू जनाउँछ । अझै भान्छालाई व्यवस्थित बनाउन फ्रीज, ओभनलगायतका किचेन अप्लायन्सहरूले महत्त्व राखेका हुन्छन् ।

त्यसो त एउटै भान्छाकोठा (डाइनिङसहित) का लागि ५०औं लाख रुपैयाँ खर्चिएर बनाइएको पनि भेटिन्छ काठमाडौंमै । तर यो आम नेपालीको हैसियतभन्दा धेरै टाढाको कुरा हो । यसैले सकेसम्म कम खर्चिएर चिटिक्कको आधुनिक भान्छा बनाउन चाहन्छन् अधिकांश परिवार ।

मध्यमस्तरको मोडुलर किचेन तयार पार्न अहिले न्यूनतम दुईदेखि साढे २ लाख रुपैयाँको हाराहारी लाग्ने यससँग सम्बन्धित व्यवसायीहरूको भनाइ छ । यद्यपि, सस्ता सामग्रीहरू प्रयोग गर्ने हो भने सामान्य किसिमको मोडुलर किचेन ५० हजार रुपैयाँमै बनाउन सकिने त्रिपुरेश्वरस्थित मोर्डन किचेनका सञ्चालक दिनेश श्रेष्ठ बताउँछन् ।

काठमाडौंको कालीमाटीस्थित युरिका किचेन ग्यालरीले एक लाख रुपैयाँमै आकर्षक मोडुलर किचेन तयार पारिदिने यसका सञ्चालक दिपुल थापाले बताएका छन् । दशैंलाई लक्षित गरेर कम्पनीले ग्राहकलाई यो मूल्यमा आधुनिक भान्छा तयार पारिदिने अफर ल्याएको उनले जानकारी दिए ।

भान्छाकोठाको आकारका साथै प्रयोग हुने प्रणाली, सामग्री र अन्य उपकरणका साथै तिनको ब्रान्ड र गुणस्तरले मोडुलर किचेनको खर्च निर्धारण गर्ने उनले जानकारी दिए । श्रेष्ठको मोर्डन किचेनले नै पनि १२ लाख रुपैयाँसम्मको मोडुलर किचेन तयार पारिसकेको उनले बताए ।

नजिकिँदो चाडपर्वलाई ध्यानमा राखेर कम्पनीले मोडुलर किचेन बनाउँदा कुल लागतको १० देखि १५ प्रतिशत र चुल्हो, चिम्नीलगायतका सामग्री खरिदमा दुईदेखि पाँच प्रतिशतसम्म छुट दिने यसकी सञ्चालक उर्मिला वन्तले बताइन् ।

मोडुलर किचेनलाई आकर्षक बनाउन किचेनमा प्रयोग हुने टायलदेखि टल युनिट अर्थात् भर्टिकल क्याबिनेटको मूल्य ३० हजारदेखि तीन लाख रुपैयाँसम्म पर्ने युरिका किचेनका थापाको भनाइ छ ।

एक लाखसम्मका किचेन चिम्नी 
नेपाली बजारमा अहिले दर्जनौं ब्रान्डका चिम्नीहरू पाइन्छन् । मार्टिन, फेवर, ग्लेन, इलिका, एल्डा, सनराइज, स्मार्ट, एसके इनर्जी इत्यादि त्यसमध्येका केही बान्ड हुन् जसको अधिकतम मूल्य एक लाखसम्म रहेको छ ।

नेपाली बजारमा पाइने इटालियन ब्रान्डका चिम्नी तथा अन्य किचेन एसेसरिजहरू पनि पछिल्लो समय भारतमै उत्पादन भएर आउने गरेका सम्बन्धित व्यापारीहरू बताउँछन् । सनराइज, स्मार्ट तथा एसके इनर्जी चिनियाँ ब्रान्ड हुन् । यी चिम्नी भारतीय उत्पादनभन्दा सस्तो पर्छ । व्यवसायीहरूका अनुसार भारतीय चिम्नीको मूल्य १३ देखि १८ हजार रुपैयाँसम्म पर्छ । इटालियन ब्रान्ड मार्टिनको चिम्नीलाई भने ४० हजार रुपैयाँ पर्ने बताइएको छ ।

फेबर, ग्लेन, ऐलिका, एल्डा इत्यादि नेपाली बजारमा पाइने भारतीय चिम्नी ब्रान्ड हुन् । यी फरक फरक ब्रान्डका भए तापनि यिनको मूल्य भने खासै फरक नरहेको मोर्डन किचेनकी वन्तले बताइन् । क्यासल तथा बाफ्फल फिल्टर प्रयोग गरिएको फेबर ब्रान्डको चिम्नी विभिन्न विशेषतामा आउँछ । यसको टच सिस्टम तथा एलईडी लाइट प्रयोग गरिएका चिम्नी दुईदेखि तीन फीटसम्म भित्तामा झुन्ड्याउन मिल्ने बताइएको छ । यस्तो चिम्नीको मूल्य विशेषता हेरेर १६ देखि ९५ हजार रुपैयाँसम्म पर्ने विक्रेताले जानकारी दिएका छन् ।

फेवरकै अर्को चलेको प्रडक्ट हो मिरर चिम्नी । नेपाली बजारमा यसको मूल्य साढे ९३ हजार रुपैयाँ रहेको छ । यसले प्रतिघण्टा एक हजार घनमिटरसम्म बाफ सोस्ने विक्रेताहरूको भनाइ छ । टच स्क्रिनबाटै चलाउन मिल्ने यो अत्याधुनिक चिम्नीलाई धेरै उपभोक्ताले मन पराएको विक्रेताहरू बताउँछन् । यी चिम्नी अटो क्लिन हुड तथा बाफ्फल फिल्टर प्रविधिसहितको पाउन सकिन्छ ।

नेपाली बजारमा पाइने धेरैजसो किचेन स्टोभ (चुल्हो) चीन र भारतबाट आयात हुने गरेका छन् । भारतीय ब्रान्डभन्दा कम मूल्यमा आउने भएकाले चिनियाँ चुल्हो उपभोक्ताको रोजाइमा बढी पर्ने गरेको व्यवसायीहरू बताउँछन् ।

बजारमा फेर्रे, ग्लेन, फेबर, एलिका, उबर, बाल्ट्रा, हुभर, एभरेडी, सिल्क इत्यादि ब्रान्डका चुल्हो पाइन्छन् । यी चुल्होहरूको मूल्य सात हजारदेखि २७ हजार रुपैयाँसम्म पर्ने विक्रेता कम्पनीहरूले जानकारी दिएका छन् ।

फेबर ब्रान्डमा बिल्ट इन हब तथा हब कुक टपमा इटालियन बर्नरको प्रयोग भएको छ । बिल्ट इन हब चुल्होको मूल्य करीब साढे २३ हजारदेखि ४३ हजार रुपैयाँसम्म पर्ने देखिएको छ । यस्तै, फेबरको कुक टप चुल्हो ३० देखि ४५ हजार रुपैयाँसम्ममा पाउन सकिन्छ ।

टर्किस ब्रान्ड ‘फेर्रे’ को चुल्होको मूल्य २१ देखि साढे ४६ हजार रुपैयाँसम्म पर्ने अल्ट्रा इन्टेरियरका सञ्चालक श्री खनालले जानकारी दिए । यो ब्रान्डको चुल्हो सुरक्षाको दृष्टिकोणले उच्चस्तरीय मानिने उनले बताए । यसका चुल्हो दुईदेखि पाँचवटासम्म बर्नर भएका पाइन्छन् ।

यस्तै, पछिल्लो समय नेपाली बजारमा विद्युतीय चुल्हो पनि प्रवेश गरेको छ । विद्युत्बाट चल्ने यस्ता चुल्होको १३ देखि ४३ हजार रुपैयाँसम्म पर्ने विक्रेताहरूले जनाएका छन् । यस्तै, किचेन रेन्जको मूल्य ग्यासबाट चल्नेको करिब ६४ हजार रुपैयाँसम्म र विद्युतीय किचेन रेन्जको डेढ लाख रुपैयाँसम्म पर्नेछ । किचेन रेन्जमा माइक्रोवेभ ओभन र बर्नर स्टोभ दुवै हुन्छ ।