कामना सेवा विकास बैंकले आफ्नो १९औं वार्षिकोत्सवको अवसरमा आयोजना गरेको ‘कामना सेवा फुट्सल कप सिजन–५’ शनिबार सम्पन्न भएको छ। पुरुष तर्फको फाइनल खेलमा सिद्धार्थ बैंकले प्राइम कमर्सियल बैंकलाई २–० ले पराजित गर्दै उपाधि जितेको छ। त्यस्तै, महिला तर्फको फाइनलमा डिफेन्डिङ च्याम्पियन लुम्बिनी विकास बैंकले ग्लोबल आइ.एम.ई. बैंकलाई १–० ले हराउँदै यस सिजनको उपाधि कायम राख्न सफल भएको छ।

वार्षिकोत्सवको अवसरमा हरेक वर्ष आयोजना हुँदै आएको यो फुट्सल प्रतियोगिता बैंकको कर्मचारीबीच आपसी सहयोग, खेल spirit र स्वास्थ्यप्रति जागरूकता अभिवृद्धि गर्ने उद्देश्यले सञ्चालन हुँदै आएको हो। विजेता र उपविजेता टोलीहरूलाई बैंकको तर्फबाट ट्रफी, मेडल र प्रमाणपत्र प्रदान गरिएको थियो। प्रतियोगिताको उद्घाटन बैंकका डि.सी.ई.ओ. विनय दाहालले एन्फा रेफ्री अन्जना सुनुवारलाई बल हस्तान्तरण गर्दै गरेका थिए। समापन कार्यक्रममा प्रमुख सञ्चालन अधिकृत विकास ढुङ्गानाले विजेता तथा उपविजेतालाई पुरस्कार वितरण गरे।

प्रतियोगितामा पुरुषतर्फ १७ र महिलातर्फ ९ टिम सहभागी भएका थिए। बैंकका विभिन्न विभागीय प्रमुख, कर्मचारी तथा सरोकारवालाहरूको उपस्थितिमा खेलहरू उल्लासपूर्ण वातावरणमा सम्पन्न भएका थिए। यस्तै, बैंकले आफ्नो १९औं वार्षिकोत्सवको अवसरमा कार्तिक २७ गते बिहीबार देशव्यापी रक्तदान कार्यक्रम पनि आयोजना गर्ने तयारी गरेको छ।