एनआईसी एशिया बैंक लिमिटेडका नवनियुक्त नवनियुक्त प्रमुख कार्यकारी अधिकृत (सिईओ) सुजित कुमार शाक्यले आफ्नो पदभार ग्रहण गरेका छन् । बैंकको २०८२/०७/१७ मा बसेको सञ्चालक समितिको ७३६ औं बैंठकको निर्णय अनुसार सिईओ पदमा नियुक्त शाक्यले बिहीबार पदभार ग्रहण गरेका हुन् ।

झन्डै तीन दशकदेखि नेपालको बैंकिङ क्षेत्रमै विशिष्ट योगदान पुर्‍याउँदै आएका शाक्यले दिल्ली विश्वविद्यालय, भारतबाट ब्याचलर इन कमर्श र इन्स्टिच्युट अफ प्रोडक्टिभिटी एण्ड म्यानेजमेन्ट, लखनऊबाट व्यवस्थापनमा स्नातकोत्तर उपाधि हासिल गरेका छन्।

सन् १९९६ मा तत्कालिन नेपाल–श्रीलंका मर्चेन्ट बैंकबाट बैंकिङ यात्रा सुरु गरेका शाक्यले हिमालयन बैंक, लक्ष्मी बैंक र सन् २००७ देखि तत्कालिन बैंक अफ एशिया नेपालमा बिजनेस बैंकिङ प्रमुखको रूपमा जिम्मेवारी निर्वाह गरे।

बैंक अफ एशिया नेपाल लि. र एनआईसी बैंकको मर्जर प्रक्रियामा महत्वपूर्ण योगदान पुर्‍याउने क्रममा, मर्जरपछि बनेको एनआईसी एशिया बैंकमा सहायक महाप्रबन्धक र कर्पोरेट बैंकिङ प्रमुखको रूपमा समेत उनले महत्वपूर्ण भूमिका निर्वाह गरे।

यसअघि शाक्यले सिभिल बैंक, जनता बैंक, ग्लोबल आईएमई बैंकमा नायब प्रमुख कार्यकारी अधिकृतको रूपमा कार्य गरेका थिए भने, नबिल बैंकमा वरिष्ठ नायब प्रमुख कार्यकारी अधिकृतको रूपमा नियुक्त हुनु अघि बैंकिङ क्षेत्रमा व्यापक अनुभव प्राप्त गरे।

उनको नेतृत्वमा एनआईसी एशिया बैंकले आगामी दिनमा सेवा विस्तार, नवप्रवर्तन र वित्तीय स्थायित्वमा थप मजबुती ल्याउने अपेक्षा गरिएको छ।