एनएमबि बैंकले आर्थिक वर्ष २०८१/८२ को चौथो त्रैमासको वित्तीय विवरण सार्वजनिक गरेको छ। विवरणअनुसार बैंकले सो वर्ष ३ अर्ब २८ करोड १७ लाख रुपैयाँ नाफा आर्जन गरेको छ, जुन अघिल्लो वर्षको तुलनामा ४६.२२ प्रतिशतले वृद्धि हो। अघिल्लो आर्थिक वर्षमा बैंकको नाफा २ अर्ब २४ करोड ४३ लाख रुपैयाँ थियो।

समीक्षा अवधिमा बैंकको वितरणयोग्य मुनाफा १ अर्ब ९० करोड ९४ लाख रुपैयाँ रहेको छ र १०.४० प्रतिशत लाभांश वितरण गर्ने क्षमता बनाएको छ। सञ्चालन मुनाफा पनि ६४.४६ प्रतिशतले बढेर ५ अर्ब ३५ करोड २ लाख रुपैयाँ पुगेको छ।

बैंकले आर्थिक वर्ष २०८१/८२ को चौथो त्रैमाससम्म ८ अर्ब २ करोड ८ लाख रुपैयाँ ब्याज आम्दानी गरेको छ, जुन अघिल्लो वर्षको ७ अर्ब २१ करोड ६७ लाख रुपैयाँभन्दा ११.१४ प्रतिशतले बढी हो।

चुक्तापुँजी १८ अर्ब ३६ करोड ६७ लाख रुपैयाँ रहेको बैंकको रिटेन्ड अर्निङ १ अर्ब ९० करोड ९४ लाख रुपैयाँ छ भने रिजर्भमा १२ अर्ब ३२ करोड ५५ लाख रुपैयाँ रहेको छ। अघिल्लो वर्ष रिटेन्ड अर्निङ ऋणात्मक ९ करोड ३८ लाख थियो।

समीक्षा अवधिमा बैंकले २ खर्ब ८० अर्ब ९२ करोड रुपैयाँ निक्षेप संकलन गरी २ खर्ब २९ अर्ब ११ करोड रुपैयाँ कर्जा लगानी गरेको छ, जुन अघिल्लो वर्षको तुलनामा दुवै रकममा वृद्धि हो।

खराब कर्जा अनुपात (एनपीएल) सामान्यरूपमा बढेर १.३७ प्रतिशत पुगेको छ। बैंकको वार्षिक प्रतिशेयर आम्दानी (ईपीएस) १७.८७ रुपैयाँ पुगेको छ, जुन अघिल्लो वर्षको १२.२२ रुपैयाँभन्दा उल्लेखनीय वृद्धि हो। प्रतिशेयर नेटवर्थ १७६.८१ रुपैयाँ र पीई रेसियो १५.१० गुणा रहेको छ।