आइएमई लाइफ इन्स्योरेन्सले सर्वसाधारणलाई सेयर जारी गर्ने (आइपीओ) प्रस्ताव वार्षिक साधारणसभाबाट पारित गरेको छ।

कम्पनीको चौथो वार्षिक साधारणसभाले अन्य कुनै जीवन बीमा कम्पनी गाभ्न/गाभिन वा प्राप्ति गर्ने सम्बन्धी आवश्यक सम्पूर्ण काम गर्न संचालक समितिलाई अख्तियारी प्रदान गर्ने प्रस्ताव पनि स्वीकृत गरेको छ।

आर्थिक वर्ष २०७६/०७७ को सञ्चालक समितिको प्रतिवेदनसहित वित्तीय विवरणहरु पनि साधारणसभाले पारित गरेको जनाएको छ।

कम्पनीका अध्यक्ष डा. रामहरी अर्यालले बीमा व्यसायमा पर्याप्त जनचेतना, दक्ष जनशक्ति र बीमा व्यवसायसम्बन्धी साक्षरताको अभाव रहेता पनि कम्पनीले सो विषयलाई अवसरको रुपमा लिएर अघि बढिरहेका बताएका छन्।

बीमा सम्बन्धी जानकारी, जनचेतना र बीमाको पँहुच न्यून आयस्रोत भएका व्यक्तिहरुमा समेत पुर्‍याउन कटिबद्ध रहेको उनले बताए।

साधारणसभाले आइपीओ प्रस्ताव पारित गरेसँगै अब कम्पनीले यसका लागि प्रक्रिया अघि बढाउनेछ। यद्यपि, सेयर कहिलेसम्ममा जारी गर्ने योजना छ भन्ने चाहिँ कम्पनीले खुलाएको छैन।