प्राइम लाइफ इन्स्योरेन्स कम्पनी लिमिटेडले प्रस्तावित १५ दशमलव ८७ प्रतिशत लाभांश पारित गरेको छ । कम्पनीले आइतवार १४औं वार्षिक साधारण सभा सम्पन्न गरी प्रस्तावित १५ प्रतिशत बोनस शेयर र कर प्रयोजनका लागि शून्य दशमलव ७९ प्रतिशत नगद लाभांश प्रस्ताव पारित गरेको हो । कम्पनीले साधारण सभा र लाभांश प्रयोजनका लागि मंसिर १० गते एक दिन बुक क्लोज गरेको छ । बुक क्लोजको आधारमा मंसिर ९ गतेसम्म कायम शेयरधनीहरुले मात्र कम्पनीको लाभांश प्राप्त गर्न सक्नेछन् ।

कम्पनीले आर्थिक वर्ष २०७६/७७ को मुनाफाबाट हाल कायम चुक्तापूँजी २ अर्ब ४१ करोड ७० लाख ५७ हजार रुपैयाँको आधारमा लाभांश वितरण गर्न लागेको हो । १५ प्रतिशत बोनस शेयर वितरणपश्चात कम्पनीको चुक्तापूँजी २ अर्ब ७७ करोड ९६ लाख १५ हजार रुपैयाँ पुग्नेछ । सभाले कम्पनीको अधिकृत पूँजीवृद्धि गरी ५ अर्ब रुपैयाँ कायम गर्ने ,जारी तथा चुक्ता पूँजी वृद्धि गर्न स्वीकृती प्रदान गर्ने, कम्पनीको शेयर लगानी अनुपात परिवर्तन गरी संस्थापक तर्फ ६० प्रतिशत तथा सर्वसाधारण तर्फ ४० प्रतिशत कायम गर्ने प्रस्ताव समेत पारित गरेको छ ।