रिलायन्स लाइफ र सानिमा जनरल इन्स्योरेन्सले आईपीओ निष्कासनका लागि नियामक निकाय नेपाल धितोपत्र बोर्डमा निवेदन दिएका छन् । रिलायन्स लाइफले रू. ६३ करोड बराबरको ६३ लाख कित्ता र सानिमा जनरल इन्स्योरेन्सले रू. ३० करोड बराबरको ३० लाख कित्ता आईपीओ विक्री गर्न अनुमति माग्दै बोर्डमा निवेदन दर्ता गराएका हुन । रिलायन्सले असार ९ गते र सानिमा जनरलले असार १४ गते निवेदन दिएका हुन ।

रिलायन्सको आईपीओ विक्री प्रबन्धक सानिमा क्यापिटल र सानिमा जनरलको एनआइसी एशिया क्यापिटल रहेको छ । हाल रिलायन्सको चुक्तापूँजी रू. १ अर्ब ४७ करोड रहेको छ । आईपीओ पश्चात कम्पनीको चुक्तापूँजी रू. २ अर्ब १० करोड पुग्नेछ । कम्पनीले चालू आर्थिक वर्षको तेस्रो त्रैमाससम्म रू. ६ करोड १८ लाखभन्दा बढी खुद नाफा गरेको छ । यस अवधिसम्म कम्पनीको जगेडा कोष रकम रू. १४ करोड ९६ लाख १२ हजार रहेको छ भने बीमा कोषमा रू. ८६ करोड ९६ लाखभन्दा बढी रकम रहेको छ ।

त्यस्तै रू. ७० करोड चुक्तापूँजी रहेको सानिमा जनरल इन्स्योरेन्सको आईपीओ पश्चात रू. १ अर्ब चुक्तापूँजी कायम हुनेछ । सानिमाले चालू आर्थिक वर्षको तेस्रो त्रैमाससम्म रू. २ करोड ८९ लाख ४७ हजार खुद नाफा गरेको छ । यस अवधिसम्म कम्पनीको जगेडा कोषमा रू. ३ करोड ७७ लाखभन्दा बढी र बीमा कोषमा रू. ४ करोड ४१ लाखभन्दा बढी रकम रहेको छ ।

बीमा बजारमा पछिल्लो समय १० जीवन बीमा र ३ निर्जीवन गरि १३ नयाँ बीमा कम्पनीहरुले कारोबार सञ्चालनको स्वीकृति पाएका थिए । सर्वसाधारणलाई शेयर जारी गरि तोकिएको चुक्तापूँजी कायम गर्ने गरि कारोबार सञ्चालनको स्वीकृति पाएका नयाँ बीमा कम्पनीहरुले शेयर जारी प्रकृया अघि बढाएका हुन ।

धितोपत्र बोर्डले जनरल इन्स्योरेन्स नेपालले पनि ३० लाख कित्ता आईपीओ विक्री गर्न असार ५ गते निवेदन दिएको छ । नयाँ बीमा कम्पनीहरुमध्य सबैभन्दा पहिला अनुमति पाएको अजोड इन्स्योरेन्सले भने ३० लाख कित्ता आईपीओ असार २५ गतेदेखि निष्कासन गर्ने मिति तय गरिसकेको छ । अजोडले आईपीओ विक्रीका लागि बोर्डबाट असार ७ गते स्वीकृति पाएको हो ।