जसरी लामो समय एभरेष्ट बैंक र लक्ष्मी बैंकको मर्जरको हल्ला मच्चाएर एभरेष्ट बैंकका अध्यक्ष विके श्रेष्ठले अर्बै रकम कमाए यसैलाई सिको गर्दै ग्लोबल आईएमई बैंकका अध्यक्ष चन्द्र ढकालले ग्लोबल बैंक र मेगा बैंक मर्जरको सहमती हुँदैछ भनी करोडौंको शेयर चलखेल गरेका छन् । तर निरिह राष्ट्र बैंक बोल्दैन ।

गत आईतबार र सोमबार मात्रै ग्लोबल र मेगा बैंकको शेयरमा चर्को चलखेल भएको छ । मेगा बैंकको अध्यक्ष एवं एमाले कार्यकर्ता भोज बहादुर शाह र ग्लोबल आईएमई बैंकका अध्यक्ष एवं माओवादी कार्यकर्ता चन्द्र ढकालको प्रक्रिया हेर्दा मर्जर नै भए जस्तो गरि सञ्चार माध्यममा आए । यो कति उचित हो गर्भनर साब ः शेयर चलखेल गर्न जे पनि बोल्न हुन्छ । यी महारथीहरुलाई कारवाही कसले गर्ने ?

पछिल्लो अवस्थामा बिग मर्जरको हल्ला चलाएर शेयर बजारमा चलखेल गर्ने समूह सक्रिय हुन थालेको देखिन्छ । केही दिनयता विभिन्न बैंक तथा वित्तीय संस्थाहरु एक आपसमा मर्ज हुने भन्ने हल्ला फैलाएर शेयर बजारमा चलखेल गरिरहेको एक बैंकका सञ्चालकले बताए । पछिल्ला दिनमा ग्लोबल आइएमई बैंकले विभिन्न बैंकसँग भएको सामान्य कुराकानीलाई पनि सहमतिको तहमा पुगेको भनि हल्ला फैलाएर बैंकको दोस्रो शेयर बजारमा चलखेल देखिन्छ ।

गत आइतबार र सोमबार मात्र ग्लोबल आइएमईको संस्थागत शेयर एक सय ७३ मूल्यको आसपासमा करिब १० करोडको खरिद बिक्री भएको छ । त्यस्तै बैंकको साधारण शेयर पनि ३०० माथि पुर्याउन धेरै कोशिस भएको देखिन्छ । यो चलखेल बैंकद्वारा गरिएको देखिन्छ ।

नेपाल राष्ट्र बैंकका गर्भनर डा.चिरनजीवी नेपालले ग्लोबल आइएमई बैंकलाई भने प्रमुख कार्यकारी नियुक्तिमा दबाब दिइरहेका बुझिएको छ । तर अध्यक्ष चन्द्र ढकालले गर्भनरको निर्देशनलाई रद्दीको टोकरीमा फाल्ने काम भएको ति सञ्चालकले बताए । ती सञ्चालकका अनुसार ग्लोबल आइएमई बैंकमा अध्यक्ष नै सर्वेसर्वा भएकाले कोसँग मर्ज गर्ने वा के गर्ने भन्ने विषय टुङग्याएर मात्र बोर्डमा छलफल हुने गरेको दाबी गरे ।

मेगा बैंकका अध्यक्ष शाहकै कारण मेगा बैंक नेपालको गत आइतबार र सोमबार राम्रै कारोबार भएको छ । बैंकको २ सय रुपैयाँ पुग्न हम्मे–हम्मे भएको शेयर २ सयभन्दा माथि पनि ठूलै भोलुममा कारोबार भइरहेको छ । यो अर्को चलखेल नभएको हो गर्भनर साब ?