अहिले १८ वटा जीवन बीमा कम्पनी सञ्चालनमा रहेका छन् । जसमध्ये ७ वटा मात्रै कम्पनी मात्रै नेपाल स्टक एक्सचेन्समा सूचीकृत भएका छन् । सबै जीवन बीमा कम्पनीले चालू आर्थिक वर्षको पहिलो त्रैमासमा वित्तीय विवरण प्रकाशित गरिसकेका छन् ।

नेपाल स्टक एक्सचेन्जमा हुने शेयर कारोबारमा जीवन बीमा कम्पनीप्रति लगानीकर्ताको आकर्षण राम्रै रहने गरेको छ । आधाभन्दा कम कम्पनी स्टक मार्केटमा सूचीकृत भएको अवस्थामा बाँकी कम्पनीहरुले सर्वसाधारणलाई शेयर जारी गरी स्टक मार्केटमा जाने तयारीमा रहेका छन् ।

यसै सन्दर्भमा प्रकाशित भएको चालू आर्थिक वर्षको पहिलो तीन महिनाको वित्तीय विवरण जीवन बीमा कम्पनीहरुको स्थिति यस्तो देखिएको छ ।

जीवन बीमा कम्पनीमध्ये चुक्ता पुँजीको आधारमा सबैभन्दा अगाडि नेपाल लाइफ इन्स्योरेन्स रहेको छ । जसको पुँजी ४ अर्ब ३९ करोडमाथि छ ।

दोस्रो स्थानमा नेसनल लाइफ इन्स्योरेन्सको २ अर्ब ६२ करोड छ । १ अर्बभन्दा माथि चुक्ता पुँजी १३ वटा कम्पनीको रहेको छ । २ वटा कम्पनीको भने ५० करोडभन्दा तल रहेको छ । जसमा गुराँस लाइफको ५९ करोड ४० लाख र राष्ट्रिय बीमा संस्थाको १८ करोड १० लाख रहेको छ ।

चालूू आर्थिक वर्षको पहिलो त्रैमासमा खुद मुनाफाको स्थितिमा सबैभन्दा उत्कृष्ट नेपाल लाइफ इन्स्योरेन्स रहेको छ । जसको नाफा २० करोड ४१ लाख रुपैयाँ रहेको छ । २० करोडभन्दा माथि कमाउने नेपाल लाइफ कम्पनी मात्रै रहेको हो ।

नेप्सेमा सूचीकृत रहेको कम्पनीहरुमा सबैभन्दा कम खुद नाफा राष्ट्रिय बीमा संस्थान रहेको छ । यस कम्पनीले ४४ लाख रुपैयाँ मात्र कमाएको छ

अघिल्लो वर्षको तुलनामा सबैभन्दा बढी मुनाफा रिलाबल नेपाल लाइफ इन्स्योरेन्स कम्पनीको ४२ दशमलव ५८ प्रतिशतले वृद्धि गरी ५ करोड २५ लाख रुपैयाँ कमाएको छ । अघिल्लो वर्षको सोही अवधिमा कम्पनीले ३ करोड ६८ लाख रुपैयाँ कमाएको थियो ।

गत वर्षको तुलनामा ११ वटा कम्पनीले नाफा बढाएका छन् भने ५ वटा कम्पनीले नाफा घटाएका छन् । त्यस्तै बाँकी २ वटा कम्पनीले भने अघिल्लो वर्षको त्रैमासको वित्तीय विवरण प्रकाशित गरेका थिएनन् ।