चार वटा राष्ट्रिय स्तरका विकास बैंकलाई गाभेको एनसीसी बैंक शाखा विस्तार कार्यलाई प्रथामिकतामा राखेर अगाडी बढर्दै आएको छ  । निजीस्तरबाट संचालित यो बैंकले हालसम्म १०८ वटा शाखा संचालनमा ल्याएको छ । मर्जरपछि कतिपय ठाउँमा शाखाहरु दोहोरिएकाले ती शाखाहरुलाई पनि मर्जमा लैजाने प्रक्रियाले गर्दा शाखा विस्तारमा पछाडी परेको र अब छिटै दुर्गम भेगहरु लगायत सुगम ठाउँहरुमा शाखा विस्तार गर्ने कुरा बैंक सम्बद्ध स्रोतले जनाएको छ ।  एनसीसी बैंकका कुल १०८ वटा शाखामध्ये उपत्यकाभित्र २६ वटा शाखा संचालनमा रहेका छन् । बाँकी ८२ वटा शाखा उपत्यका बाहिरका विभिन्न ठाउँहरुमा रहेका छन् ।

क्षेत्रीय कार्यलय पाँच वटा
एनसीसी बैंकका क्षेत्रीय कार्यलयहरु पाँच वटा रहेका छन् । विराटनगर, भैरहवा, नेपालगञ्ज, काठमाडौँ र विरगञ्जमा एनसीसी बैंकले क्षेत्रीय कार्यलयहरु स्थापना गरेको छ ।

एक वर्षमा ४० वटा शाखा 
गत आर्थिक वर्षमा एनसीसी बैंकले ४० वटा शाखा संचालनमा ल्याएको छ  । बैंकले उपत्यकाभित्र १२ वटा र बाँकी २८ वटा शाखा उपत्यका बाहिरका विभिन्न स्थानमा संचालन गरेको थियो ।  साथमा, गत बर्षमा ६१ वटा एटिएम थियो हाल ९ वटा एटिएम थप गरी ७० वटा पुर्याएको छ ।

३० वटा जिल्लामा शाखा पुग्न बाँकी
नेपालका कुल ७७ वटा जिल्लामध्ये ४७ जिल्लामा एनसीसी बैंकको शाखा विस्तार भैसकेका छन् भने बाँकी ३० वटा जिल्लामा एनसीसी बैंकको शाखा पुगेका छैनन् । सोलुखुम्बु, ओखलढुङगा, संखुवासभा, खोटाङ, भोजपुर, पाँचथर, धनकुटा, धादिङ, नुवाकोट, रसुवा, मनाङ, मुस्ताङ, गोरखा, पुर्वि रुकुम, प्यूठान, अर्घाखाँचि, हुम्ला, मुगु, डोल्पा, कालिकोट, जुम्ला, जाजरकोट, पश्चिम रुकुम, सल्यान, डडेलधुरा, बाजुरा, बझाङ, दार्चुला, अछाममा एनसीसी बैंकले  शाखा विस्तार गरेको छैन । यी जिल्लाहरुमा पनि छिटै शाखा विस्तार गर्ने कार्यनीति अगाडी बढाइसकेको बैंकले जनाएको छ । अहिलेसम्म बैंकिङ पहुँच नपुगेको १६ वटा स्थानीय तहहरुमा एनसीसी बैंकका शाखा पुग्दै छन् ।

चालु आर्थिक वर्षमा १७ वटा शाखा थपिँदै
चालू आर्थिक वर्षमा एनसीसीले शाखा विस्तारलाई प्राथमिकतामा राखेको छ । यो आर्थिक वर्षभित्र कुल १७ वटा शाखा विस्तार गरी कुल शाखा संख्या १२५ पुर्याउने बैंकको योजना छ । जसमध्ये, १३  वटा शाखा साउन महिनाभित्र नै संचालनमा ल्याउने र अरु बाकि शाखा यस आर्थिक बर्षभित्र संचालनमा ल्याउने बैंकले जनाएको छ । सबै स्थानीय तहरुमा बैंकको शाखा पुर्याउने सरकारी योजनालाई ध्यानमा राखी बैंकिङ पहुँच नपुगेका पहाडी तथा हिमाली क्षेत्रको अति विकट स्थानहरुमा बैंकको शाखा पुर्याउने बैंकको योजना रहेको छ ।

कुन प्रदेशमा कति शाखा
साउन महिनामा संचालनमा आउने तरखरमा रहेका १७ शाखासहित एनसीसी बैंकका शाखा १२५ पुग्दैछन् । जसमध्ये, सबैभन्दा बढि शाखा प्रदेश नं. ३ मा रहेका छन् । यहाँ कुल ४३ वटा शाखा सञ्चालनमा रहेका छन् । त्यस्तै प्रदेश नं. ६ मा सबैभन्दा थोरै ७ वटा शाखा मात्रै सञ्चालनमा रहेका छन् । यसबाहेक, प्रदेश नं. १ मा १४ वटा, प्रदेश नं २ मा १९ वटा, प्रदेश नं ४ मा १७ वटा, प्रदेश नं.५ मा १७ वटा र प्रदेश नं ७ मा ८ वटा शाखा संचालनमा रहेका छन् ।

शाखाबाहेक, एनसीसी बैंकले एक एक्सटेन्सन काउन्टर र ७० वटा एटिएम मार्फत ग्राहकहरुलाई सेवा दिँदै आएको छ । हालसम्म यस बैंकमा डेविट कार्ड होल्डरको संख्या ८० हजार दुई सय ९०, इन्टरनेट बैंकिङ प्रयोग गर्ने ग्राहकहरुको संख्या ९ हजार पाँच सय ९८ र मोबाइल बैंकिङको प्रयोगकर्ताहरुको संख्या ५ हजार पाँच सय ३२ रहेको छ । कुल १०८ शाखामध्ये, एनसीसी बैंकका १९ वटा शाखामा लक्कर सुविधा रहेको छ ।