जीवन बीमा कम्पनीहरु मध्ये सर्बाधिक चुक्ता पूँजी भएको नेपाल लाईफले व्यवसाय बिस्तार गरेर १० अर्ब ६९ करोड ५७ लाख खुद बीमा शुल्क आर्जन गरेको छ । गत बर्ष कम्पनीले ७ अर्ब ८१ करोड ७३ लाख खुद बीमा शुल्क आर्जन गरेकोमा दुई करोड ८७ लाखले बढाएको हो ।

नेपाल लाइफले चालू आर्थिक बर्षको ९ महिना अवधिमा ४३ करोड ५७ लाख रुपैयाँ खुद नाफा गरेको छ । यो बिमांकीय मुल्यांकन अघिको हिसाब भएकाले बास्तविक खुद नाफा यो भन्दा अरु धेरै हुनसक्छ । गत आवको यसै अवधिमा कम्पनीले ४० करोड ९६ लाख रुपैयाँ खुद नाफा कमाएको थियो ।

कम्पनीले सवैभन्दा बढी चुक्ता पूँजी कायम गरेर सोही अुनसार बीमा ब्यवसाय र खुद नाफा पनि बढाउँदै लगेको छ । नेपाल लाईफले गत आर्थिक बर्षको तेस्रो त्रैमासमा तीन अर्ब ९ करोड ६४ लाख चुक्ता पूँजी कायम गरेकोमा यस बर्षको सोही अवधिसम्म चुक्ता पूँजी चार अर्ब ३९ करोड ६९ लाख पुर्याएको छ ।

गत आर्थिक बर्षको नाफाबाट र जगेडाको प्रयोगबाट ४२ प्रतिशत बोनस वितरण गरेपश्चात उसको जगेडा कोष चार अर्ब ७३ करोडबाट तीन अर्ब ४८ करोडमा झरेको छ । कम्पनीकाे जीवनकोषको आकार ४७ अर्ब ६८ करोड २६ लाख रुपैयाँ तथा महाविपत्ति कोषमा ३२ करोड ५४ लाख रुपैयाँ सञ्चित रहेको छ ।

उसको प्रतिसेयर आम्दानी १३.२१ रुपैयाँ, प्रति सेयर नेटवर्थ १८६.५५ रुपैयाँ, मूल्य आम्दानी अनुपात ८७.४० गुणा र औसत प्रतिफल दर ११.७० प्रतिशत रहेको छ ।

चैतसम्ममा आफ्नो आम्दानी गत बर्षको तुलनामा २८ लाखले बढाएर ८२ करोड ६५ लाख रुपैयाँ आम्दानी गरेको छ । यस अवधिमा इन्स्योरेन्सको नोक्सानी व्यवस्था रकम १९ करोड बढेपछि ३९ करोड ०७ लाख खर्च गरेको छ ।

कम्पनीले हालसम्म ६३ अर्ब १५ करोड रुपैयाँ बीमा शुल्क आर्जन गरेकोमा यस आवमा मात्रै १० अर्ब ७७ करोड रुपैयाँ आर्जन गरेको छ । नेपाल लाईफमा बिमितहरुको संख्या एक लाख ११ हजार बढी रहेको छ ।

यस अवधिमा कम्पनीले २७ हजार ९४४ संख्यामा परेको दाबी वापत तीन अर्ब ९१ करोड २५ लाख रुपैयाँ भुक्तानी गरेको छ भने ९४ करोड ८९ लाख रुपैयाँ भुक्तानी हुन बाँकी देखिन्छ ।

गत बर्ष कम्पनीले १७ हजार ८९५ संख्यामा परेको दाबी वापत एक अर्ब ९४ करोड ५७ लाख रुपैयाँ भुक्तानी गरेको थियो भने ५८ करोड ९४ हजार रुपैयाँ भुक्तानी हुन बाँकी थियो ।

नेपाल लाईफको बोनस दर ६२ रुपैयाँदेखि ८२ रुपैयाँसम्म रहेकाले जीवन बीमा गर्नेहरुले पनि राम्रै प्रतिफल हासिल गरिरहेका छन् ।